  |
  
|
9月14日
小夢近來都想搞搞新意思....所以又再一次整一個特別既蛋糕啦....
其實以前已經post過木糠布甸....而布甸係一杯杯既....
呢個就唔同....係一個蛋糕~
今次呢個蛋糕....同千層蛋糕類似....都係材料預備快....但工夫多...
為左要個蛋糕既層次分明....所以今次我係用唧袋黎唧cream....
而且今次又再加上小夢DIY朱古力葉....襯返個杏色既蛋糕喔~~^_^
做完左之後....真係非常有成功感呀~~*
先比大家睇個側面....係唔係好靚呢~^^?
今次粒士多啤梨好似大個左d呀...哈...因為屋企d士多啤梨都無細粒呀~*
今次我放左兩層雪芳蛋糕....所以口感好好~*
切開比大家睇下啦....係唔係睇見都覺得軟綿綿...好香既味道呢~*
9月9日
大家好呢~!今日教大家整一個又好味....又特別....口感又好既蛋糕喔~
就係千層蛋糕啦~~~呢個cake既口味都好彈性....
因為裡面既生果.....係可以自選....你鐘意放咩野就放咩野嫁啦~~
我點解突然想整呢個cake....係因為我覺得我成日整來整去都係果幾款...
好似無咩新意思....所以今次就專登選一款cake係可以搞搞新意思啦~^^"
今次仲有老公仔既朋友試食...大家都話好食呀...個個都話正~~
今次咁成功....下次有朋友生日...就有新款cake啦...yeah~
比大家睇下相先啦....今次我放左士多啤梨同埋芒果....
想放藍莓但係無減價呀...唔捨得買呀....好貴唷~~*
呢個蛋糕....最緊要既係組合果一part....手工好緊要.....要每層按實....
如果唔係切開時會唔靚....可能仲有洞洞....咁就唔靚嫁啦~^^~*
睇下幾多生果!! 正呀~~~睇翻相我都流哂口水呀~*
切開都唔易散....唔會易溶....分餅時又一定靚仔整齊....可以拎去賣啦~~yeah~~*
9月2日
話說之前有blog友留言....話比小夢聽李錦記既麻婆豆腐醬都好好味嫁~
所以呢日專誠做呢一味....試下有幾正先....試煮結果係....100分~~yeah~~
估唔到係真正麻辣....雖然辣...不過係辣得黎條利係痺痺地咁....唔會勁飲水...
真係我都係第一次食到咁好味既麻婆豆腐呀...好味過出面的呢~^^
所以小夢已經煮左兩次啦....百吃不厭呀....正~
老公都話好食....不過佢唔係好受得辣~^^"
兩次都唔同口味嫁~~~
第一次煮 : 最後落左半碗仔水 + 粟粉一茶匙 (比較辣....鐘意辣既正)
第二次煮 : 最後落左一滿飯碗水 + 粟粉兩茶匙 (比較多汁....無咁辣....撈飯一流)
大家一定要試下呀~~^_^
仲有...如果有好野一定要繼續講我知呀~^_^...多謝大家~*
上面既係第二次煮....水會比較多dd~^^...老公岩食d~*
撈飯飯一流.....記得一樣野呀....就係記得要煮多d飯喔~*
9月5日
好耐無開爐啦~~~終於到左老公豬一年一度既生日....梗係要大顯身手啦~
話說果日....我地約好左一大班朋友仔....去左觀塘食日式放題呀....
wow....真係好好味嫁bo~~間餐廳叫做 "外野手" 日本料理.....係朋友介紹....
8:30 我地一坐落.....我就請人幫我地放個cake入雪櫃先嫁啦係咪?
點知佢話要收我地切餅費50大元呀....真過份....又唔係酒店....
好在一大班人share返都唔算貴啦....唔緊要....開心最緊要呀嘛....
到左 9:45....我就叫佢地拎出黎啦....點知佢一行埋黎....cake仲拎係佢手...
佢就話 : 不如我幫你地切啦? 好嗎? ...我地即刻大大聲叫住....真火大...
我即刻用一個 "你白痴的嗎?" 既語氣....(係語氣only)....
我話 : 唔好~~~~你....放....低....先...ok? 
(誓死保護蛋糕!!!)
(大家一齊心諗....生日蛋糕梗係壽星仔切嫁啦....你到傻傻地...唔洗許願吹蠟燭呀?)
佢一走開...一齊講...佢傻左呀 / 佢無腦 / 好彩叫得住...等等....
我當然嚇到冷汗都出埋啦~~~^_^"
我辛辛苦苦整出黎....佢想連個全相都唔比大家睇下咩?
唔通裝飾得咁辛苦...比佢切到一忽忽咁先上台?!....50蚊都唔洗咁下話?
終於個蛋糕都順利去到最後....吹完蠟燭....切完....大家都話好食....
嘻嘻....真係好開心呀....不過因為佢個雪櫃好似唔涷咁....
定係跟本無雪櫃放=_="....個cake食果時已經有dd溶咁....謝謝地....嗚...
今次我仲係最後....整左3塊朱古力葉放上去....但係之後先發現唔記得左影相呀...
好啦....唔好咁長氣啦....比大家睇下生日會既蛋糕先啦~~*
嘻...上面呢d裝飾....我整左好耐嫁啦....砌左好耐先滿意~^^
為左令佢地唔好因為拎出街而移位....我塗左一層果面光亮劑~*
8月20日
呢一排老公仔放大假....咁我都收左爐了....
因為呢段時間要好好享受2人世界~^^
但係我果鋪入廚癮....要搵d野去安撫嫁嘛~^_^"
所以就著手去搵下....有d咩野簡單又好味既食物...可以兩個人一齊入廚既~~
期實我好鐘意食魚香茄子嫁....跟住記起李錦記有出一種方便醬料.....
然後見到有blog友....話試過係好味道嫁...所以我就買黎試下先....
原來真係好易整....易到我唔信...三兩下....20分鐘左右就整好哂啦~
個味道仲真係好好....所以我才特意同大家分享一下....好岩我呢d初學者...
本來仲想買一舊咸魚....但可惜懶去搵....一定要再整加咸魚試下~^_^
我食左兩大碗飯呀....真係好滿足....
要特別鳴謝....老公仔做切茄子同埋拎鑊剷果個....
因為老婆我好怕比d油彈到...我只係從旁指手劃腳果個^^~*
係唔係好似樣呢....連味道都好得嫁~*
配飯一流....真係 "有魚香茄子....添飯添多兩次"~*
7月17日
嘻嘻~~因為小夢既老公豬近日放大假....所以無咩野時間上來update呀....sorry~
見今日8號風球....先有d時間update^^~
好啦....今日教大家既係.....pizza hut食到既蒜蓉包啦....yeah~~
今次小夢再用中種法.....然後做了兩條....一條就塗上超市購買既香草蒜蓉醬....
而另一條就塗上李錦記既蒜蓉.....試下邊一種係最好食....
實驗結果顯示......李錦記係好食好多既....
李錦記 : 個樣唔似....因為蒜頭好大粒...口感亦唔好....但係味道真係似足pizza hut
香草蒜蓉醬 : 個樣就好似....但係味道真係無咩野蒜味....唔夠香....
所以我覺得...如果能將李錦記既蒜蓉.....花d時間磨爛....變得幼細d....咁就100%正~
不過我未試呢~~如果做完我再post上黎先~^^
好啦.....去片~~*
下面係用左香草蒜蓉醬....唔係咁好食....我估轉返無香草果種可能好d....
因為個味太重香草味.....但個樣就100%似出面街的~*
近鏡影一幅先~~~睇下幾正....下面既係李錦記蒜蓉....粗粒既~*
兩條包包岩岩出爐....真係口水流~*
比大家睇下岩岩出爐時既樣先....好靚仔嫁~*
7月9日
上次整左曲奇....今次又轉下口味.....整呢個蛋糕....
我其實好少整牛油蛋糕嫁....因為我成日覺得太多牛油了....
但係今日又想試下整....所以就決定整一次啦....
呢一個食譜已經好多人知道....亦好多人做過....
我覺得我整得無人地咁靚呀...>_<
下次試下朱古力既比例減少少...7:3咁啦....應該個花紋會更加靚....
下次又再改變一下落麵漿既方法....希望會更加有清楚花紋啦~^_^
呢一個食譜....男仔一定鐘意....因為係重口味....
老公豬...一食完就話正呀....我跟手就打擊佢 : 好多牛油先咁好食嫁咋^0^
你食得多會好肥嫁~~老公豬話唔緊要啦....咁好食~*
個雲石花紋都唔靚....嗚嗚....不過真係好食...嘻嘻~*
下面係未切開既樣.....個面頭係有花紋嫁~*
7月7日
呢一日無無聊聊咁....又無特別預備甚麼材料....唯有整一款家中齊料既曲奇先~
次次都整脆曲奇....今次試下整美式軟曲奇....
今次呢一個曲奇....係Angel blog度搵出黎既....
其實脆曲奇 VS 軟曲奇...有咩野分別呢.....
脆曲奇 : 用砂糖做的.....脆身
軟曲奇 : 用黃糖做的.....外脆內軟....有一點蛋糕感
點解黃糖做出黎既曲奇會軟身呢?.....係因為黃糖有保濕作用....焗完出黎似蛋糕口感....
而且....黃糖會比砂糖來得更健康.....所以大家都可以一試呢~^^
成品Look有D似上次既作品.....因為我無準備果仁呀.....
下次要整一次有果仁既....再POST上來呢~^^
大家要注意既就係....控制焗爐時間方面....真係差一兩分鐘就會脆身...
所以大家唔好焗太耐喔....剛好就可以了....
如果第一次出黎脆身....下次調較返短d時間就可以....
我今次既成品.....岩岩好都係邊邊脆....中間軟....真係好特別嫁~
睇下個look....係唔係見到都流口水呢~?? ^0^
